Бармак уеннары


2016-02-11 21:27:00

Бу бармак-бабай,
Бу бармак-әби,
Бу бармак-әти,
Бу бармак-әни,
Бу бармак-нәни бәби,
Аның исеме- чәнти!

*****************

Баш бармак баш кашый,
Имән бармак имән ташый,
Урта бармак утын яра,
Атсыз бармак ат җигә,
Чәнти бармак чәй эчә.

*****************

Баш бармак,
Балан ияк,
Урта тияк,
Әби-чеби,
Нәни бәби.

*****************

Карга килер — казан асар,
Торна килер — тоз салыр,
Саескан килер — салма салыр,
Песнәк килер — пешерер,
Чыпчык килер — төшерер,
Моңа бирер, моңа бирмәс,
Моңа бирер, моннан әлыр,
Кетер, кетер, кетер,
Казан төбен кимер…
(Чәнти бармагын тотып, баланың уч төбен кытыклыйлар.)

*****************

ЯШЕЛЧӘ, ҖИЛӘК-ҖИМЕШЛӘРНЕ ИСТӘ КАЛДЫРУ ӨЧЕН БАРМАК УЕНЫ 

Бу бармак- кабак,
Бу бармак- борыч,
Бу бармак- кишер,
Бу бармак- кыяр,
Бу бармак- суган.
Яшелчә быел уңган,
Бакчабызда бар да бар!
Шунсы кызык, болар барсы
Кәрзингә ничек сыйган?
Бу бармак- чөгендер,
Бу бармак- сарымсак,
Бу бармак- баклажан,
Бу бармак- помидор,
Бу бармак- бәрәңге.
Бик тиз җыеп бетердек,
Ярый әле өлгердек.
Җәйге яңгыр килеште,
Яшелчәләр тиз үсте.

********************

Бу бармак-груша,
Бу бармак-чия,
Бу бармак-персик,
Бу бармак-лимон,
Бу бармак-алма.
Кайсы үсә бакчада,
Кайсы бардыр сатуда.
Витаминнарга бик бай,
Бик куана кыз, малай.

********************

Бу бармак-виноград,
Бу бармак-ананас,
Бу бармак-абрикос,
Бу бармак-апельсин,
Бу бармак-мандарин.
Ашап кына өлгер син!
Китергәннәр ерактан,
Кышка-язга карамый,
җиләк-җимеш яшелчәне
Бутап әйтү ярамый!

 

БАРМАКЛАРНЫ ӨЙРӘНӘБЕЗ

Баш бармак – баш кашый
Имән бармак – имән ташый,
Урта бармак – утын яра
Атсыз бармак – ат куа
Чәнчи бармак – чәй эчә.
Шуңа үсмәгән дә ул!


  • Аноним

    • 07
    • 04
    • 2016
    • в 02:18

    Рәхәт бик зур! Стенага беркетеп ятлармын, бала белән уйнау өчен бик кызыклы мәгълүматлар.


    Тагын да кызыграк: